Nær daglega eru fluttar fréttir af miklum straumi fólks frá ýmsum Ameríkuríkjum til Bandaríkjanna en á síðustu mánuðum hefur bandaríska landamæralögreglan handtekið rúmlega 100.000 manns, sem reyndu að komast ólöglega yfir landamærin, í hverjum mánuði.
En ferðin til Bandaríkjanna er lífshættuleg og hörð stefna Donald Trump varðandi landamæri landsins hafa valdið því að sífellt fleiri fara hættulegar leiðir til að komast til Bandaríkjanna. Þetta verður mörgum að bana.
Nú er áhugi fólks farinn að beinast í auknum mæli að Evrópu. Á fyrstu fimm mánuðum ársins jókst fjöldi hælisleitenda frá Venesúela, Kólumbíu, El Salvador og Hondúras töluvert. 18.500 Venesúelamenn hafa sótt um hæli í Evrópu það sem af er ári segir Evrópska hælisumsóknarstofnunin. Þetta eru tvöfalt fleiri en á sama tíma á síðasta ári. Þetta setur Venesúela í þriðja sæti yfir þau lönd hvaðan flestir hælisleitendur koma. Sýrland og Afganistan eru í tveimur efstu sætunum.
Frá Kólumbíu hafa 11.000 manns komið og sótt um hæli í Evrópu á árinu.
The Guardian segir að margir innflytjendur telji það vænlegri leið að fljúga til Evrópu og sækja um hæli þar en að greiða smyglurum fyrir að koma þeim til Bandaríkjanna. Flestir sækja um hæli á Spáni en það er allt annað en auðvelt fyrir fólkið að fá hæli. Spænsk yfirvöld veita þeim sjaldan hæli sem eru að flýja efnahagsleg vandræði eða ofbeldi glæpagengja.