Þann 17. nóvember 1969 henti Paul Gilmore, 13 ára, flöskuskeyti fyrir borð þegar hann var á siglingu ásamt fjölskyldu sinni á leið til Ástralíu en þangað var fjölskyldan að flytja. Í síðustu viku fundu Paul Elliot og níu ára sonur hans, Jyah, flöskuskeytið á strönd í Suður-Ástralíu.

Carle Elliott, móðir Jyah og eiginkona Paul, birti færslu um þetta á Facebook í þeirri von að henni tækist að hafa uppi á Gilmore segir í frétt ABC.

Systir Gilmore, Annie Crossland, fannst fljótlega og gat upplýst að Gilmore er þessa dagana á siglingu í Eystrasalti. Hún sagði ótrúlegt að flöskuskeytið skuli hafa fundist.

Í skilaboðunum í skeytinu segir Gilmore að hann sé um borð í skipi sem heiti Fairstar en það flutti fjölda breskra innflytjenda til Ástralíu. Hann hvatti jafnframt finnandann til að senda sér línu og gaf upp heimilisfang sitt í Victoria. Fairstar var um 1.000 mílur frá Fremantle í vesturhluta Ástralíu þegar hann kastaði flöskuskeytinu fyrir borð.