Þegar Lee Hadwin sefur er hann ekki eins og við hin þegar við sofum. Hann tekur upp eitthvað sem er nærri honum og byrjar að teikna. Þetta hefur hann gert síðan hann var fjögurra ára og enginn veit af hverju hann gerir þetta.

Þegar hann var barn að aldri voru það veggir sem urðu oft fyrir barðinu á teikniáráttu hans í svefni. Með árunum þróuðust teikningar hans og þegar hann var 15 ára teiknaði hann fallega mynd af Marylin Monroe á meðan hann svaf. Hann man ekkert eftir þessu frekar en öðrum teikningum sem hann hefur gert steinsofandi. BBC skýrir frá þessu.

Það er vel þekkt að sumir tala í svefni og að aðrir ganga í svefni. En teikniþörf Lee er öllu sjaldgæfari og mjög athyglisverð í ljósi þess að þegar hann er vakandi hefur hann enga sérstaka listamannshæfileika.

Hér er hægt að sjá myndband frá BBC um Lee og teiknihæfileika hans.