Aðfaranótt sunnudags voru 50 ár liðin frá því að Neil Armstrong steig fyrstur manna fæti á tunglið. Allt var þetta í beinni sjónvarpsútsendingu enda var Bandaríkjamönnum mikið í mun að sýna umheiminum að þeir færu fremstir í flokki allra þjóða. En þrátt fyrir að hálf öld sé liðin frá þessu þá trúir minnihluti Bandaríkjamanna og meirihluti Rússa því að allt hafi þetta verið sviðsett til að Bandaríkin gætu unnið mikinn áróðurssigur í kalda stríðinu.

Ein elsta og vinsælasta samsæriskenningin um þetta gengur út að geimflauginni hafi í raun og veru verið skotið á loft en áhöfnin hafi verið flutt frá borði, um bakdyr, á síðustu stundu og síðan falin á leynilegum stað úti í eyðimörk. Þaðan hafi verið sendar sjónvarpsmyndir af meintri lendingu og fyrstu sporunum á tunglinu.

Bandaríska geimferðastofnunin NASA og valdamiklir stjórnmálamenn hafi staðið á bak við þetta. Þessu voru gerð góð skil í kvikmyndinni Mission Capricorn, frá 1978, og enn lifa samsæriskenningar á borð við þessa góðu lífi.

Skoðanakannanir hafa í gegnum tíðina sýnt að 5 til 6% Bandaríkjamanna telja að fyrrgreind samsæriskenning eigi við rök að styðjast. Mörg rök hafa verið sett fram til að styðja þessa kenningu. Meðal annars að það geti ekki passað að bandaríski fáninn, sem var rekinn niður á tunglinu, lafi ekki beint niður á stönginni, það ætti hann að gera því ekkert andrúmsloft sé á tunglinu.

Í Rússlandi telja tæplega 60% aðspurðra að Bandaríkjamenn hafi ekki lent á tunglinu og háttsettir menn og stjórnmálamenn hafa viðrar efasemdir sínar um þetta opinberlega.