Í Paignton í suðvesturhluta Englands átti dramatískur atburður sér stað nýlega. Chihuahua-hundurinn Gizmo var þá úti í garð ásamt eiganda sínum sem var að hengja upp þvott. Skyndilega birtist stór máfur og tók Gizmo og flaug á brott með hann.

Becca Hill, eigandi hundsins, birti færslu um þetta á Facebook og í kjölfarið hafa margir breskir fjölmiðlar fjallað um málið. Í samtali við Devon Live sagði hún að máfurinn hafi flogið langt í burtu með Gizmo og þau viti ekki hvort hann sé lífs eða liðinn.

Í Facebookfærslunni hvetur hún fólk til að hafa samband ef það sér Gizmo.

Bresku dýraverndarsamtökin RSPCA segja að það sé ekki hversdagslegur atburður að máfur taki hund og fljúgi á brott með hann og þetta hljóti að hafa verið skelfileg lífsreynsla fyrir eigendur Gizmo.