Verst er ástandið í Nýju Suður Wales og suðurhluta Queensland. Þar óttast íbúar nú að fljótlega þýði ekki að skrúfa frá krönum, ekkert vatn muni koma úr þeim. Í sumum bæjanna er „Day Zero“ yfirvofandi innan nokkurra vikna. „Day Zero“ er notað um þann dag sem vatnið hleypur til þurrðar. Í öðrum bæjum er reiknað með að vatnið dugi í þrjá til tólf mánuði.
Linda Scott, fylkisstjóri í Nýju Suður Wales, segir að staðan sé mjög alvarleg. Það geti orðið nauðsynlegt að flytja vatn mörg hundruð kílómetra leið með flutningabílum til bæjanna, það sé eina leiðin til að koma vatni til þeirra.
Víða eru vötn uppþornuð og vatnsból nærri tóm og það sama á við um margar ár. Ekki bætir úr að nær engar líkur eru á rigningu eins langt og veðurfræðingar sjá.
Sumir bæjanna eru litlir með um 4.000 íbúa en aðrir með 30.000 til 40.000 íbúa.
Íbúar í bæjunum hafa þurft að laga sig að ástandainu. Börn hafa lært að spara vatn eins og hægt er þegar þau þvo sér um hendurnar. Ekki er lengur sturtað niður þegar fólk pissar bara. Þegar fólk fer í sturtu er það bara örsnöggt undir vatni, rétt til að skola líkamann.