Þær 18 milljónir dollaramilljónamæringa, sem eru til á heimsvísu, hafa um hríð undirbúið sig undir verðfall á hlutabréfamörkuðum. Í fyrsta sinn í mörg ár á þessi hópur meira í reiðufé og öðru handbæru fé en í hlutabréfum. Minni fjárfestar hafa hins vegar ekki dregið jafn mikið úr hlutabréfaeign sinni.

Í hinni árlegri skýrslu World Wealth frá Capgemini kemur fram að þrátt fyrir að hlutabréfavísitölur hafi hækkað á milli ára þá eigi dollaramilljónamæringar heimsins minna af hlutabréfum en áður. Reiðufé og annað, sem telst sem handbært fé, hafi komið í stað hlutabréfaeignar. Milljónamæringarnir séu orðnir meðvitaðri um áhættuna og möguleikann á hugsanlegu verðfalli hlutabréfa og þar með eignarýrnunar.

Meðal þekktra fjárfesta sem hafa farið þessa leið er hinn 88 ára gamla goðsögn Warren Buffett en fjárfestingafélag hans, Berkshire Hathaway, á nú um 120 milljarða dollara í handbæru fé. Buffet, sem þykir hafa mjög gott auga fyrir tækifærum á hlutabréfamarkaði, hefur látið hafa eftir sér að hlutabréfaverð sé nú svo hátt að erfitt sé að finna áhugaverð kauptækifæri.

Í World Wealth skýrslunni kemur fram að hlutabréf séu nú 26 prósent af heildareignum milljónamæringanna en hafi áður verið 31 prósent.