Þegar þú ferðast erlendis og dvelur á hótelum skaltu helst af öllu forðast það að skella ferðatöskunni inn í skáp eða skella henni á rúmið þegar þú tekur upp úr henni.

Óboðnir gestir leynast stundum á hótelherbergjum en hér er vísað til veggjalúsar (e. bedbugs). Veggjalús er blóðsuga sem heldur sig meðal annars til í rúmum fólks. Hún lætur oftar en ekki til skarar skríða á næturna þar sem hún sýgur blóð grunlausra gesta.

Apartment Therapy ræddi við skordýrafræðinginn Brittany Campbell sem gaf ferðalöngum nokkur góð ráð áður en haldið er í ferðalög erlendis.

Brittany segir að veggjalúsin haldi sig oftar en ekki í dýnum eða sófum og það fari ágætlega um hana ef hún kemst í farangur fólks, fatnað til dæmis.

Brittany segir það ekki alltaf duga að skella farangrinum á sérstakar töskurekka sem stundum eru til staðar á hótelum. Lúsin eigi auðvelt með að klifra og geti komið sér nokkuð auðveldlega á milli staða. Það fer þó allt eftir undirlaginu.

Sjálf segist Brittany mæla með því að ferðalangar geymi farangurinn inni á baðherberginu – og jafnvel ofan í baðkarinu ef það er til staðar. Segir hún að líkurnar á að finna veggjalúsina á baðherberginu séu litlar þar sem aðstæður þar eru erfiðar fyrir hana. Þannig á hún erfitt með að klifra upp flísar, postulín eða gler.

Brittany ráðleggur þeim sem er illa við að geyma farangurinn á baðherberginu að vefja honum inn í plast eða stóran plastpoka. Svo er auðvitað hægt að taka sénsinn á því að engar veggjalýs séu til staðar.