Erfingjar Sam Walton, sem stofnaði Walmart verslunarkeðjuna, eru ekki á flæðiskeri staddir. Auður þeirra er mikill og á undanförnum árum hefur hann aukist töluvert. Auðurinn eykst um 4 milljónir dollara á hverri klukkustund en það svarar til tæplega 500 milljóna íslenskra króna.

Bloomberg skýrir frá þessu. Tölurnar eru byggðar á samantekt miðilsins um þénustu fjölskyldunnar undanfarið ár en Bloomberg tók nýlega saman lista yfir 25 auðugustu fjölskyldur heims en það er gert árlega.

Í júní á síðasta ári var auður fjölskyldunnar metinn á 152 milljarða dollara en nú, ári síðar, var hann kominn í 191 milljarða dollara.

Þrjár bandarískar fjölskyldur verma toppsæti listans. Í öðru sæti er Mars-fjölskyldan, sem á Mars súkkulaði vörumerkið. Í þriðja sæti er Koch-fjölskyldan sem er í ýmsum iðnaði og lætur mikið til sín taka á stjórnmálasviðinu.

Í umfjöllun Bloomberg kemur fram að hugsanlega sé toppnum náð í þénustu fjölskyldnanna vegna viðskiptastríðs Trump við Kína og óttans við að ekki sé svo langt í alheimskreppu.

„Það getur verið mjög erfitt að varðveita auð til langs tíma. Fjölskyldufyrirtæki geta lent í niðursveiflum, fjárfestingar þeirra geta verið of einhæfar og það geta komið upp vandamál þegar nýjar kynslóðir taka við stjórnartaumunum.“

Hefur Bloomberg eftir Rebecca Gooch hjá Camden Wealth.