Flestir kjósa eflaust að sleppa því að drekka áfengi á vinnutíma og vilja vera edrú í vinnunni. En það virðist flugfreyja hjá Air Wisconsin í Bandaríkjunum ekki hafa getað. Þegar hún flaug með morgunflugi á milli Chicago og South Bend í Indiana að morgni 2. ágúst síðastliðinn var hún svo drukkin að hún vissi ekki hvar hún var þegar vélin var lent í South Bend. Hún var fjarlægð úr vélinni af lögreglumönnum.

Belleville News-Democrat skýrir frá þessu. Fram kemur að flugfreyjan sé 49 ára. Haft er eftir Aron Scherb, sem var farþegi í vélinni, að áður en vélin tók á loft hafi flugfreyjan rekist á sæti og farþega, misst hluti og verið mjög óskýr þegar hún fór yfir öryggisreglurnar. Hún hafi hætt því eftir 10 sekúndur og hafi verið mjög óskýr í máli í þessar 10 sekúndur.

Lögreglan beið vélarinnar þegar hún lenti og handtók flugfreyjuna. Rannsakað var hvort hún glímdi við heilsufarsvandamál en svo reyndist ekki vera að því er segir í dómsskjölum. Hún var einfaldlega undir áhrifum áfengis. Hún játaði einnig að hafa drukkið vodka rétt áður en hún mætti í vinnu.

Hún hefur nú verið ákærð fyrir ölvun á almannafæri og að stofna lífi farþeganna í hættu. Hún á allt að sex mánaða fangelsi yfir höfði sér og hefur auk þess verið rekin úr starfi.