Solberg ræddi við fréttamenn á mánudaginn um málið en það hefur vakið mikinn óhug meðal Norðmanna. Hún sagði meðal annars að Norðmenn og Svíar eigi að vinna saman gegn uppgangi nýnasista á Norðurlöndunum. En skyndilega tók málið nýja stefnu þegar hún kenndi Svíum um uppgang nýnasista:
„Þegar nýnasistar þramma um norskar götur heyrir maður mikla sænsku talaða því sænskir nýnasistar reyna einnig að koma undir sig fótunum í nágrannalöndunum.“
Anders Ygeman, utanríkisráðherra Svíþjóðar, var ekki sáttur við þetta og hann svaraði Solberg á Twitter:
„Við viljum gjarnan að Noregur og Svíþjóð vinni saman en þú ert í ríkisstjórn með Framfaraflokknum og þú hefur útnefnt Sylvi Listahaug, sem er mjög hægrisinnaður stjórnmálamaður, sem ráðherra tvisvar. Þess vegna ættir þú að líta í spegil áður en þú horfir yfir landamærin.“
Mörgum þykja ummæli Solberg undarleg og ekki síst í ljósi þess að í Noregi var mannskæðasta hryðjuverk sögunnar á Norðurlöndunum framið þegar hægriöfgamaðurinn Anders Breivik myrti 77 manns. Maðurinn sem réðst á gesti í moskunni nærri Osló um helgina er einnig hægriöfgamaður eins og Breivik.
Á hinn bóginn má ekki gleyma að í Svíþjóð eru margir hægriöfgamenn, miklu fleiri en í Noregi, og virðast sænsk yfirvöld ekki hafa nægilega góð tök á þeim.