Dómstóll í Bandaríkjunum hefur dæmt Nicholas Slatten, fyrrverandi öryggisvörður hjá fyrirtækinu Blackwater, hefur verið dæmdur í lífstíðarfangelsi fyrir hlut sinn í morðum á fjórtán óbreyttum íröskum borgurum árið 2007.
Blackwater var fyrirtæki sem sá um að útvega líf- og öryggisverði meðan bandaríski herinn hafði viðveru í Írak. Slatten var fundinn sekur um morð af fyrstu gráðu í desember síðastliðnum.
Saksóknarar sögðu að Slatten hefði verið sá fyrsti af liðsmönnum Blackwater sem skaut úr byssu sinni þennan örlagaríka dag. Starfsmenn Blackwater sögðust hafa verið að verjast vopnuðum vígamönnum en sannað þótti að svo var ekki. Hóf hópurinn skothríð á óbreytta borgara á fjölförnu torgi í Bagdad til að bandarísk bílalest kæmist leiðar sinnar. Alls létust fjórtán í árásinni; tíu karlar, tvær konur og tveir ungir drengir, 9 og 11 ára. Sautján til viðbótar særðust.