Árlega smitast mjög margir af kynsjúkdómnum klamyídu. Sem betur fer er frekar fljótlegt og ódýrt að meðhöndla slík smit en samt sem áður er sjúkdómurinn töluvert heilsufarsvandamál. Þrír af hverjum fjórum, sem eru smitaðir, sýna ekki einkenni og því getur liðið langur tími áður en upp kemst að fólk sé með hann. Klamydía getur einnig valdið því að fólk getur ekki eignast börn, að fóstur lendi utan legsins og krónískum verkjum í kynfærum hjá konum.

Vísindamenn hjá dönsku sóttvarnarstofnuninni hafa nú stigið stórt skref í átt að gerð bóluefnis gegn klamydíu. Búið er að prófa það á fólki og niðurstöðurnar lofa góðu.

„Það virkaði nákvæmlega eins og við vonuðum. Fyrir það fyrsta er bóluefnið öruggt. Auk þess sáum við ónæmiskerfi kvenna bregðast við því. Nákvæmlega eins og við viljum sjá.“

Hefur Danska ríkisútvarpið eftir Frank Follmann, deildarstjóra hjá sóttvarnarstofnuninni, sem tók þátt í þróun bóluefnisins.

Niðurstöður rannsóknar vísindamannanna hafa verið birtar í vísindaritinu The Lancet Infectious Diseases.

Bóluefnið var prófað á 35 breskum konum. Þetta ekki mikill fjöldi en hópurinn var hafður lítill þar sem um fyrstu prófun á fólki var að ræða. Næsta stig er að prófa bóluefnið á stærri hópi. Follmann sagði að nú skipti miklu máli að sjá hvernig líkamar kvennanna bregðast við bóluefninu til langs tíma.

„Við erum mjög ánægð með niðurstöðurnar. Þær sýna að bóluefnið forritar ónæmiskerfið til að stöðva klamydíu en við verðum að sýna auðmýkt í tengslum við það því við vitum ekki hversu langvarandi ónæmi það veitir.“

Sagði Follmann.

Af þessum sökum verður efnið nú prófað á fleiri konum í lengri tíma. Follmann er bjartsýnn og sagðist telja að ef allt gengur vel verði bóluefni tilbúið á markaðinn eftir fimm til sjö ár.