43 ára ísraelsk flugfreyja smitaðist af mislingum þegar hún var við störf í flugi El Al frá New York til Ísrael í apríl.  Hún veiktist illa og varð fyrir heilaskaða og var í dái þar til hún lést nýlega.

BBC skýrir frá þessu. Fram kemur að þetta hafi verið þriðja dauðsfallið af völdum mislinga í Ísrael frá því í nóvember á síðasta ári. Þar á undan hafði enginn látist af völdum mislinga í 15 ár þar í landi. Mislingar eru einn mest smitandi sjúkdómur heims.

Í lok síðasta árs létust 82 ára kona og 18 mánaða barn í Jerúsalem af völdum mislinga.

Bólusetningar hafa valdið því að mislingasmitum hefur fækkað mikið en á undanförnum árum hefur þeim þó fjölgað á ný vegna tregðu margra til að láta bólusetja sig og börn sín.