Segir blaðið að hægrisinnaðir sænskir popúlistar, í samvinnu við erlenda aðila, hafi dreift þessum sögum og áróðri. Blaðið hefur rannsakað innihald á vefsíðum sænskra hægripopúlista, þróun mála hjá þeim, hverjir koma að málum og fjármögnun starfs þeirra. Blaðið segir að erlendir aðilar hafi hjálpað þeim sænsku með því að tryggja uppgang hægrisinnaðra vefsíðna. Margar þeirra hafa fengið fjárframlög frá rússnesk/úkraínsku fyrirtæki.
Haft er eftir Johnny Castillo, sem býr í Rinkeby í Stokkhólmi, að að ungmennum af innflytjendaættum hafi verið boðnir peningar 2017 fyrir að „valda óspektum“ og hafi það verið rússneskir sjónvarpsmenn sem buðu þetta. Ungmennin höfðu áður tekið þátt í óeirðum í hverfinu, grýtt lögregluna og kveikt í bílum. Castillo segir að Rússarnir hafi viljað sýna að Trump hefði rétt fyrir sér varðandi Svíþjóð, að fólk sem kæmi til Evrópu væri hryðjuverkamenn og vildi skaða jafnvægið í samfélaginu. Castillo og fjórir aðrir voru til staðar þegar Rússarnir buðu ungmennunum fyrrnefnda greiðslu.
Trump vakti mikla athygli á kosningafundi í febrúar 2017 þegar hann ræddi um Svíþjóð og það sem þar væri að gerast í tengslum við innflytjendur en þá höfðu verið töluverðar óeirðir í Rinkeby hverfinu. Ummælin féllu í tengslum við að hann ræddi um nokkrar evrópskar borgir þar sem fólk hafði verið drepið í hryðjuverkaárásum. Ummæli Trump fóru illa í Svía og kröfðust sænsk stjórnvöld skýringa á þeim. New York Times segir að útlendingar hafi að vissum hluta kynt undir óeirðunum í Rinkeby.
Svíar hafa tekið við miklum fjölda flóttamanna og innflytjenda á undanförnum árum. Í heildina eru 34 prósent landsmanna fæddir utan Svíþjóðar eða eiga foreldri sem er fætt utan Svíþjóðar.