Hörmulegt atvik átti sér stað í Sulhamstead í Berkshire á Englandi í gærkvöldi þegar lögregluþjónn var drepinn. Lögregluþjónninn, hinn 28 ára Andrew Harper, var í útkalli vegna innbrots í hús þegar ekið var á hann. Tíu voru handteknir vegna málsins, karlar á aldrinum 13 til 30 ára og eru þeir grunaðir um morð.
Andrew dróst talsverða vegalengd með bifreiðinni áður en annarri bifreið var ekið á hann.
Í frétt Mail Online um harmleikinn kemur fram að Andrew hafi kvænst ástinni í lífi sínu þann 18. júlí síðastliðinn. Þau hafi verið á leið í brúðkaupsferð í næstu viku til að fagna.
Bretar hafa áhyggjur af vaxandi fjölda ofbeldisglæpa í landinu. Í gær var til dæmis unglingur stunginn til bana í suðurhluta Lundúna og fjölskyldufaðir var drepinn í borginni Newcastle eftir að hafa verið stunginn með skrúfjárni. Þá varð maður fyrir talsverðum höfuðmeiðslum eftir að ráðist var á hann fyrir utan breska innanríkisráðuneytið. Öll þessi ofbeldisverk voru framin á 24 klukkustunda tímabili.
Þessu til viðbótar hafa hnífaárásir verið mjög algengar í Bretlandi og varla liðið sá dagur að undanförnu að lögregla fái ekki slíkt mál inn á borð til sín.