Nýlega funduðu embættismenn í Hvíta húsinu með fulltrúum tölvufyrirtækja til að kortleggja hlutverk samfélagsmiðla og internetsins í árásum öfgasinna. Donald Trump, Bandaríkjaforseti, var ekki lengi að varpa sökinni á internetið og samfélagsmiðla fyrir sumar þeirra skotárása sem hafa verið gerðar í Bandaríkjunum að undanförnu.
Af þessum sökum funduðu embættismenn Hvíta hússins með fulltrúum þessara fyrirtækja til að ræða hvernig sé hægt að koma í veg fyrir fjöldamorð og öfgavæðingu í framtíðinni.
Samfélagsmiðlar hafa á undanförnum árum dregist inn í fjöldamorð þvert gegn vilja sínum. Má þar nefna beina útsendingu hvíts öfgamanns á Facebook þegar hann myrti tugi manna í mosku í Christchurh á Nýja-Sjálandi.
Ekki er ljóst hvort hægt sé að þróa hugbúnað sem getur tekist á við mál sem þessi. Í Bandaríkjunum hafa sumir einnig áhyggjur af að slíkur búnaður muni brjóta gegn ákvæðum um tjáningarfrelsi og ritskoðun.