Þó að rúm tíu ár séu síðan matvæla- og lyfjastofnanir víða um heim vöruðu við neyslu á „töfradrykknum“ Miracle Mineral Solution nýtur hann enn nokkurra vinsælda.

Landlæknisembættið hér á landi varaði við drykknum árið 2010 og sagði hann geta valdið alvarlegum veikindum og jafnvel dauða.

„Í þessari lausn er 28% natríum klórít (NaClO2 ) sem er ætlað að lækna marga sjúkdóma, allt frá alnæmi til berkla. Engin vísindaleg gögn liggja fyrir sem styðja notkun þessarar lausnar við sjúkdómum. Natríum klórít er eitur sem valdið getur metrauðablæði (methemoglobulinemia), skemmdum á rauðum blóðkornum og nýrnabilun,“ sagði í tilkynningunni.

Bandarískir fjölmiðlar greina frá því að enn sé verið að markaðssetja vöruna á netinu í Bandaríkjunum, í óþökk þarlendra heilbrigðisyfirvalda. Í frétt NBC News er haft eftir sérfræðingi að fólk geti í raun allt eins drukkið klór.  Ned Sharpless, fulltrúi bandaríska lyfja- og matvælaeftirlitsins, hvetur fólk til að vera á varðbergi og ekki undir neinum kringumstæðum neyta þessarar vöru.

Í frétt NBC má sjá að drykkurinn virðist njóta nokkurra vinsælda í Bandaríkjunum. Þannig hafa sextán þúsund tilkynningar komið til eitrunarmiðstöðva í Bandaríkjunum á síðustu fimm árum sem varða einstaklinga sem hafa veikst eftir að hafa drukkið drykkinn. Á sama tíma hafa átta einstaklingar látist.