„Ég fékk verki, ég taldi að um nýrnasteinskast væri að ræða því ég hef fengið svoleiðis áður.“
Sagði hún í samtali við KOTA-TV. En læknar sáu fljótt að nýrnasteinar áttu hér engan hlut að máli. Giltz var barnshafandi og fæðing var hafin en hún var gengin 34 vikur. Læknarnir töldu að hún gengi með tvíbura en svo var nú ekki því hér var um þríbura að ræða.
„Maður heyrir ekki oft um þríbura getna á náttúrulegan hátt, hvað þá að gengið sé með þá í 34 vikur án þess að vita af þunguninni. Ég fór til lækna og hélt að ég þyrfti að fara í aðgerð vegna nýrnasteina en endaði með að fara í keisaraskurð. Þetta er klikkun.“
Börnunum heilsast vel. Þau fæddust með fjögurra mínútna millibili og voru hvert um sig um tvö kíló. Þau hafa fengið nöfnin Blaze, Gypsy og Nikki segir í umfjöllun ITV.
