Í Kaliforníu hefur Scott Stone tekið þátt í tilraunum vísindamanna við UC Davis Department of Animal Science með nýtt fóður handa nautgripum. Stone er með um 800 nautgripi á landareign sinni. Hann hugsar mikið um umhverfismál og loftslagsmál og hefur reynt að vera með eins umhverfisvæna starfsemi á búgarði sínum og hægt er. Hann notar sólarrafhlöður og notar umhverfisvænan áburð á graslendur sínar.
Þetta kemur fram í umfjöllun Danska ríkisútvarpsins um málið. Samstarf Scott og vísindamannanna gengur út á að blanda þangi saman við fóður nautgripanna en þangið bætir meltingu þeirra og dregur úr mangi þess metangass sem þeir prumpa og ropa en 95 prósent gassins kemur út þegar þeir ropa.
Sameinuðu þjóðirnar reikna með að samhliða því að sífellt fleiri þróunarlönd verði efnaðri muni eftirspurn eftir kjöti og mjólkurvörum aukast um rúmlega 70 prósent fram til 2030. Það þýðir auðvitað meiri losun gróðurhúsalofttegunda.
Ermias Kebreab, prófessor, stýrir tilrauninni. Í henni er notuð þangtegund sem heitir Asparagopsis Armata. Niðurstöður tilraunanna lofa mjög góðu. Með því að blanda smávegis af þangi saman við fóðrið minnkar losun metangass frá nautgripunum um rúmlega 50 prósent segir Kebreab. Hann telur að þegar búið verður að ná fullri stjórn á blönduninni og hlutföllunum verði hugsanlega hægt að minnka losunina um 80 til 90 prósent.
En til að þetta gangi upp þarf að útvega nægilegt magn af þessari tegund þangs. Þangið sem nú er notað er keypt frá Íslandi og er dýrt segir Scott sem segist sjá að það sé gott fyrir nautgripina, umhverfið og kjötið. Því sé hann reiðubúinn til að leggja sitt af mörkum við þessar tilraunir og hagnast minna af rekstri sínum en ella.
Vísindamennirnir undirbúa nú í samstarfi við vísindamenn við háskólann í San Diego að hefja tilraunir með stórfellda ræktun á Asparagopsis Armata. Þær verða fyrst gerðar í tilraunastofum en síðan í hafinu. Kebreab segist hafa trú á að búið verði að leysa þetta mál innan ár. Þang geti því orði mikilvægur hluti þegar rætt er um loftslagsbreytingarnar.