Mistök urðu til þess að fágæt bifreið sem framleidd var árið 1939 seldist ekki á uppboði hjá RM Sotheby‘s á dögunum.

Bifreiðin sem um ræðir var hönnuð af Ferdinand Porsche árið 1939 að beiðni Adolfs Huehnlein, fulltrúa þýska Nasistaflokksins og leiðtoga bifreiðadeildar flokksins, NSKK. Það sama ár stóð til að halda kappakstur frá Berlín til Rómar til að fagna samvinnu Ítalíu og Þýskalands.

Ekkert varð þó af kappakstrinum þar sem síðari heimsstyrjöldin braust út um það leyti sem keppnin átti að byrja. Aðeins eitt eintak var framleitt af bílnum.

Sitt sýndist hverjum um uppboðið vegna sögu bílsins og þeirrar staðreyndar að hann var framleiddur fyrir nasista í Þýskalandi. Ástæða þess að ekki tókst að selja bílinn hefur þó ekkert með siðferði að gera heldur miklu frekar mistök sem Sotheby‘s gerði á sjálfu uppboðinu.

Í frétt Independent kemur fram að uppboðshaldarar hafi tilkynnt að hæsta boð stæði í 70 milljónum dala, þegar raunin var að hæsta boð stóð í 17 milljónum dala. Svo fór að fólk hætti við að bjóða í bílinn og þar sem bíllinn náði ekki lágmarksverði á uppboðinu seldist hann ekki.

Það var fleira en saga bílsins sem vakti spurningar hjá fólki. Þannig hefur verið fullyrt að bíllinn sé af tegundinni „Porsche“ en staðreyndin er sú að fyrsti bíllinn sem seldist undir merkjum Porsche var Porsche 356 sem kom á markað árið 1948.