Vice skýrir frá þessu. Þetta er í fyrsta sinn sem þessi sveppur, sem nefnist TR4, finnst í Ameríku en hann hefur fundist víða um heim síðan hann uppgötvaðist á Taívan á tíunda áratug síðustu aldar. Nú óttast menn að hann dreifist um alla Suður-Ameríku.
„Ef þú finnur hann er það um seinan og hann hefur líklega dreift sér án þess að það uppgötvaðist.“
Hefur National Geographic eftir Gert Kema sem er prófessor í plöntusjúkdómum.
Þegar TR4 berst á nýja staði lifir hann í jarðveginum í 30 ár en útilokað er að rækta bananaplöntur eða aðrar ávaxtaplöntur í jarðveginum á meðan. Engin lækning er til við þessum skæða sveppi.
Kólumbísk yfirvöld hafa blandað lögreglunni og her landsins í baráttuna við sveppinn en stór landbúnaðarsvæði hafa verið sett í einangrun vegna hans. Embættismenn fylgjast náið með allri uppskeru enda er mikið í húfi því bananar eru þriðja stærsta útflutningsvara Kólumbíu.
Bananategundin, sem smit hefur greinst í, er hinn svokallaði Cavendish-banani en það er vinsælasta bananategund heims en tæplegur helmingur allra þeirra banana sem eru ræktaðir í heiminum eru af þessari tegund.
Þetta er ekki í fyrsta sinn sem skaðvaldar herja á banana. Svokölluð Panamaveiki gerði út af við þá vinsælustu bananategund heims, Gros Michel. Cavendish-bananinn kom í hans stað og töldu menn að tegundin væri ónæm fyrir sjúkdómum en nú liggur ljóst fyrir að svo er ekki.