Bandaríski repúblikaninn Steve King komst heldur betur í kastljósið í síðustu viku eftir að skýrt var frá því að hann hefði varið bann við fóstureyðingum með þeim rökum að mannkynið ætti nauðgunum og sifjaspelli tilvist sína að þakka.

„Væri eitthvað fólk eftir í heiminum ef ekki hefði verið fyrir nauðganir og sifjaspell?“

Sagði hann í samtali við Des Moines Register dagblaðið þegar hann var að verja stuðning sinn við fóstureyðingarbann sem gerir engar undantekningar vegna nauðgana eða sifjaspells.

Demókratar brugðust illa við þessum orðum hans og margir hvöttu hann til að segja af sér þingmennsku. Kirsten Gillibrand, demókrati sem sækist eftir að verða forsetaframbjóðandi flokksins á næsta ári, tjáði sig um málið á Twitter og sagði King vera til vansa og hann ætti að segja af sér þingmennsku. Undir þetta tóku Bernie Sanders, Cory Bokker, Beto O‘Rourke og Julián Castro sem einnig sækjast eftir að verða forsetaframbjóðendur flokksins.

Samflokksmenn King voru heldur ekki allir sáttir við hann og sögðu undarleg ummæli hans og framkomu draga úr vægi þeirra skilaboða sem repúblikanar vilja koma á framfæri í tengslum við umræðuna um bann við fóstureyðingum.

King er ekki óvanur því að vera umdeildur en ummæli hans um kynþætti og innflytjendur hafa oft farið fyrir brjóstið á fólki sem og tengsl hans við hvíta þjóðernissinna víða um heim. Þetta hefur orðið til þess að hann er óvelkominn í fulltrúadeild Bandaríkjaþings og er það eitt af því fáa sem þingmenn repúblikana og demókrata í deildinni geta sameinast um.