Það er ekki sjálfgefið að vatnsrennibrautir séu öruggar með öllu þó vatnsleikjagarðar kappkosti við að hafa öryggið í fyrirrúmi. Bresk kona má teljast heppin að vera á lífi eftir ferð niður eina slíka í vatnsleikjagarði í Búlgaríu í sumar.

Jade Graves, 29 ára móðir frá Hull á Englandi, slasaðist illa þegar hún renndi sér niður rennibraut í Aqua Paradise-vatnsleikjagarðinum í Nessebar. Garðurinn er vinsæll meðal ferðalanga og er umrædd rennibraut, The Space Jam, sögð ein sú rosalegasta í garðinum. Þar eru gestir nánast í lausu lofti stóran hluta ferðarinnar niður.

Jade vissi að eitthvað var þegar hún kom niður. Hún fann miklum og skyndilegum verk í mjöðminni og sá síðan blóðið fossa niður fæturna. Það var ekki fyrr en hún komst undir læknishendur að í ljós kom að slagæð hafði farið í sundur. Ekki liggur fyrir hvað fór úrskeiðis en læknar töldu mögulegt að það hefði eitthvað að gera með þann mikla þrýsting sem myndast þegar komið er niður og ferðin stöðvast. Ljóst má vera að Jade var í hættu stödd enda missti hún talsvert magn af blóði.

„Ég veit ekki hvað fór úrskeiðis þar sem ég fylgdi öllum reglum sem settar voru,“ segir hún við breska fjölmiðla. Jade fór í aðgerð þar sem gert var að sárum hennar og þurfti hún að dvelja á spítala í fjóra daga á eftir. Hún var svo frá í fimm vikur eftir að hún kom heim til Bretlands.

Graves hefur ákveðið að stefna forsvarsmönnum vatnsleikjagarðsins og fá bætur vegna málsins. Segist hún vona að það verði að minnsta kosti til þess að slys af þessu tagi endurtaki sig ekki.