Ekki er útilokað að í vetrarbrautinni okkar séu allt að 10 milljarðar hlýrra og blautra pláneta á borð við jörðina okkar. Þetta er niðurstaða vísindamanna við Penn State háskólann sem notuðu gögn frá Kepler stjörnusjónauka bandarísku geimferðastofnunarinnar NASA til að leggja mat á fjölda jarðlíkra pláneta í vetrarbrautinni.

Niðurstöður þeirra voru nýlega birtar í The Astronomical Journal. Fram kemur að þeir telja að jarðlíkar plánetur séu hugsanlega á braut um fjórðu hverju sól í vetrarbrautinni. Þetta gerir um 10 milljarða pláneta.

Þetta mat er mikilvægt skref í leitinni að lífi utan jarðarinnar því mestar líkur eru á að finna líf á plánetum sem líkjast jörðinni.

Vísindamenn vonast til að öðlast enn betri skilning á fjölda jarðlíkra pláneta þegar Wide-Field Infrared Survey sjónaukanum verður skotið á braut um jörðu um miðjan næsta áratug en hann mun leita að ummerkjum um súrefni og vatn á fjarlægum plánetum.