Breski Verkamannaflokkurinn vill að breska þingið verði kallað strax saman. Ástæðan er umtöluð svört skýrsla, sem var unnin fyrir ríkisstjórnina, um hugsanlegar afleiðingar Brexit án samnings. Í skýrslunni kemur fram að búast má við öngþveiti og ringulreið og skorti á ýmsum nauðsynjum mánuðum saman.

John McDonnell, talsmaður Verkamannaflokksins í fjármálum, segir að þingið verði að koma fljótt saman til að ræða Brexit í kjölfar fyrrnefndrar skýrslu. Boris Johnson, forsætisráðherra, er staðráðinn í að Bretar gangi úr ESB þann 31. október næstkomandi, með eða án samnings. ESB hefur hafnað öllum umleitunum hans um að taka upp nýjar viðræður um útgöngusamning.

Eins og DV skýrði frá fyrr í dag birti The Sunday Times fyrrnefnda skýrslu á sunnudaginn.

McDonnell segir að skýrslur um yfirvofandi hættuástand kalli á að þing komi strax saman þrátt fyrir sumarleyfi. Sumarfríið á að vara til 3. september.  Hann segir að meirihluti sé á þinginu gegn útgöngu úr ESB án samnings.