Þegar Jackson Hepner, 12 ára, var að leik við læk nærri veitingahúsinu The Inn at Honey Run í Millersburg í Ohio í Bandaríkjunum í síðasta mánuði gerði hann magnaða uppgötvun. Hann fann risastóra tönn en hún stóð að hluta upp úr jarðveginum. Tönnin reyndist vera úr mammút.

CNN skýrir frá þessu. Fram kemur að faðir Jackson og frændi hans séu báðir áhugamenn um náttúrufræði og hafi fljótlega fundið út úr að hér var um mammútstönn að ræða. Samband var haft við fornleifafræðinga sem ætla að rannsaka svæðið betur. Þeir fengu tönnina góðu einnig til rannsókna en Jackson segist vonast til að fá hana aftur sem fyrst því hann vilji sýna vinum sínum hana.