Það vakti hörð viðbrögð þegar Donald Trump, forseti Bandaríkjanna, setti fyrr í mánuðinum meiri kraft í viðskiptastríðið við Kína, verð á hlutabréfum um heim allan féll einnig hratt. En það eru ekki bara Kínverjar sem Trump beinir sjónum sínum að þegar talið berst að viðskiptum. Á kosningafundi í New Hamphire í síðustu viku gagnrýndi Trump enn einu sinni lönd ESB, beita Bandaríkin óréttlæti, samkvæmt forsetanum.

„ESB er verra en Kína, bara minna. Það fer mjög illa með okkur með hindrunum, tollum og sköttum“, sagði Trump samkvæmt Bloomberg fréttastofunni. Þetta er ekki í fyrsta sinn sem Trump beinir spjótum sínum að ESB. Hann hefur margoft bent á gríðarlegan halla á viðskiptum við bæði Kína og ESB, sem bendi til þess að bandarísk fyrirtæki séu beitt órettlæti. Vegna þessa óréttlætis hefur Trump sett tolla á innflutning á stáli og áli frá löndum innan ESB. Hann hefur einnig hótað því að settir verði á tollar á innflutning á bílum frá Evrópu, ef ekki tekst að gera nýjan fríverslunarsamning við ESB.

Nýjar tölur frá Eurostat sýna að á fyrstu sex mánuðum ársins var viðskiptajöfnuður ESB gangvart Bandaríkjunum hagstæður um 75 milljarða evra. Það er töluverð aukning miðað við sama tíma í fyrra. Það eru einmitt tölur á við þessar sem, að mati margra stórra banka, munu fá Trump til að endurvekja viðskiptastríð sitt við ESB. Viðstkiptastríðið á milli Bandaríkjanna og ESB hefur verið á ís á meðan Bandaríkin heyja orrustu við Kína.

Samkvæmt Bloomberg íhugar Trump enn að skella tollum á innflutning á bílum frá Evrópu. Það mun hafa sérstaklega slæm áhrif á þýska bílaframleiðendur og mun ýta þýskum efnahag enn nær kreppu.