Lögreglan í Madrid, höfuðborg Spánar, handtók 53 ára Kólumbíumann á dögunum en sá er grunaður um að hafa stundað það að taka myndir undir pils kvenna og stúlkna. Lögreglan hefur borið kennsl á 555 fórnarlömb, en í þeim hópi eru stúlkur sem taldar eru vera undir lögaldri.
Breska blaðið Independent skýrir frá þessu.
Minnst 283 myndbönd eru síðan sögð hafa ratað á klámsíður þar sem þau eru með mörg milljón áhorf. Talið er að maðurinn hafi stundað þessa iðju nánast daglega upp á síðkastið og hélt hann sig að mestu til á fjölsóttum stöðum eins og járnbrautarlestum.
Við húsleit á heimili mannsins fundust fartölva og þrír harðir diskar sem allir voru stútfullir af myndböndum. Maðurinn er í haldi lögreglu og á hann yfir höfði sér fangelsisdóm vegna málsins.