Þjófar beina oft sjónum sínum að bifreiðum með lyklalausu aðgengi enda virðist það á köflum vera nokkuð auðvelt að stela slíkum bílum.

Þetta má meðal annars sjá í myndbandi sem íbúi einn í Bretlandi náði á eftirlitsmyndavél við heimili sitt þegar bifreið af tegundinni Tesla var stolið á dögunum.

Á myndbandinu sjást tveir menn koma aðvífandi. Annar er með þar til gerðan búnað á sér og sést hann koma sér fyrir við útidyrahurð hússins.

Búnaðurinn sem maðurinn er með nemur merki frá sjálfum bíllyklinum og varpar því áfram. Bíllyklar eru oftast geymdir í anddyrinu sem er ástæða þess að maðurinn kemur sér fyrir við útidyrahurðina.

Eigandi hússins segir að bifreiðin hafi verið í eigu bróður hans og það hvernig mennirnir stálu bílnum hafi komið honum mjög á óvart, sérstaklega hversu stuttan tíma það tók.