Peningarnir streyma úr sjóðum Boeing flugvélaframleiðandans vegna vandræðanna með 737 Max vélarnar sem hafa verið kyrrsettar mánuðum saman. Á flugvelli í Washington geymir Boeing mörg hundruð slíkar vélar, sem eru tilbúnar til notkunar en ekki má nota, og bíður þess að vélarnar fái flugleyfi á nýjan leik.

Vandræðin hófust eftir tvö flugslys í Eþíópíu og Indónesíu en í þeim fórust 346 manns. Galla í 737 Max vélunum er kennt um slysin.

Nú hefur Boeing þurft að ráða mörg hundruð starfsmenn til þess að gæta flugvélanna á flugvellinum Í Washington, halda þeim við og sinna því sem þarf að sinna í kringum þær. Vélarnar eru fyrir flugfélög sem höfðu pantað þær en bíða þess að flugbanninu verði aflétt en ekki er vitað hvenær það verður.

Á öðrum ársfjórðungi nam tap Boeing 3 milljörðum dollar og er að mestu tilkomið vegna vandræðanna með 737 Max vélarnar.