Um 330 þúsund manns búa í þýsku borginni Bielefeld í sambandslandinu Norðurrín-Vestfalía. Þó að borgin sé aldagömul eru margir sem halda því fram að Bielefeld sé hreinlega ekki til.
Þessi samsæriskenning kom fyrst fram á sjónarsviðið árið 1993, um það leyti sem internetið fór að ryðja sér til rúms meðal almennings. Talið er að kenninguna megi rekja til tölvunarfræðings, Achim Held að nafni, sem varpaði henni fram í gríni – í raun til að gera grín að öðrum samsærikenningum.
Síðan þá hefur kenningin verið vinsæl meðal þeirra sem aðhyllast samsæriskenningar og hefur borgaryfirvöldum reynst erfitt að hrista þennan stimpil af sér. Angela Merkel, kanslari Þýskalands, grínaðist eitt sinn með það að hún efaðist um tilvist borgarinnar.
Nú hafa borgaryfirvöld ákveðið að sá sem getur færst sönnur á að borgin sé ekki til fá eina milljón evra, eða 140 milljónir króna, í verðlaun.
Bielefeld er sem fyrr segir sögufræg og aldagömul borg. Borgin fór illa út úr loftárásum bandamanna í seinni heimsstyrjöldinni. Eitt þekktasta fyrirtæki borgarinnar er matvælafyrirtækið Dr. Oetker, sem meðal annars framleiðir hinar gómsætu Ristorante-pizzur.