,,Staðan er langt í frá að vera góð þessa dagana, árnar eru að þorna upp eftir tólf vikna endalausan þurrk og engar rigningar. Veiðin er líka mjög róleg og laxarnir í vandræðum víða vegna vatnsskorts,“ sagði veiðimaður sem er búinn að reyna og reyna í sumar í nokkrum veiðiám. Þessi veiðimaður hefur aðeins fengið einn lax í allt sumar.

Sama hljóðið er í fleiri veiðimönnum þessa dagana enda sýna tölurnar á angling.is þetta svart á hvítu. Það er verið að berja á sömu löxunum dag eftir dag í litlu vatni. Vatnsstaðan er í sögulegu lámarki eins og Norðurá í Borgarfirði og fleiri ám á svæðinu.

Veiðiár á Vesturlandi er verst staddar enda veiðin lítil sem enginn viku eftir viku. Lokanir tímabundið væri kannski ekki vitlaus hugmynd, staðan er alls ekki góð.  Litlar sem engar rigningar eru í kortunum, frekar kuldi.

Auðvitað vona allir að það fari að rigna eldi og brennisteini næstu daga, það er það sem þarf.