Laxinn er að ganga að ströndinni og brátt berast væntanlega fréttir að hann sjáist í hverri ánni á fætur annarri. Einstöku sinnum veiðast þeir í grásleppunet og þessi kom fyrir nokkrum dögum í slíkt net fyrir austan undir Skálanesbjargi milli Seyðisfjarðar og Norðfjarðar.
Þetta er mitt á milli Breiðdalsár og Jöklu sem eru miklar stórlaxaár og freistandi að ætla að hann hafi verið á leið í aðra hvora!
Veiðimaður var Haraldur Árnason og sagði hann að þetta hafi verið glæsilegur lax og greinilega af náttúrulegum stofni en skaddaðist aðeins í netinu sem von var. Hann vó slétt 15 kg og er 112 cm langur og mjög þykkur, glæsilegur fiskur.
Tekið verður hreisturssýni af laxinum og þá verður hægt að fá meiri upplýsingar um hann.
,,Við opnum Jöklu 27. júní og Breiðdalsá 1. júlí og miðað við hvernig vorar þarna fyrir austan lofar það góðu með startið. Til dæmis er Jökla strax komin í sumarvatn 20-30 rúmmetra á sekúndu,“ sagði Þröstur Elliðason hjá Strengjum um stöðuna.
Mynd. Haraldur Árnason með laxinn sem var 15 kg og er enginn smásmíði.